कोल्हापूर शहराचे प्रलंबित प्रश्न लवकरच मार्गी लावणार : नगरविकास मंत्री एकनाथ शिंदे;
कोल्हापूर शहरास मंजूर केलेल्या कोट्यावधींच्या निधीबाबत राज्य नियोजन मंडळाचे कार्यकारी अध्यक्ष राजेश क्षीरसागर यांच्यावतीने सत्कार
कोल्हापूर : नगरविकास मंत्री म्हणून नाम.श्री.एकनाथ शिंदे कोल्हापूर शहरास वरदहस्त लाभले आहे. त्यांच्याकडे सातत्याने केलेल्या पाठपुराव्यामुळे गेल्या वर्षभरात कोल्हापूर शहरास कोट्यावधींचा निधी प्राप्त झाला आहे. शहराचा विकास करण्याचे ध्येय शिवसेनेने आखले असून, नगरविकास मंत्री नाम.श्री.एकनाथ शिंदे साहेबांकडून त्यास पाठबळ मिळत आहे. त्यामुळे त्यांचा यथोचित सत्कार व्हावा, अशी भावना शिवसैनिकांसह शहरवासीयांच्या मनात होती. नगरविकास मंत्री नाम.श्री.एकनाथजी शिंदे साहेबांचा काल वाढदिवस होता, यानिमित्त आज ते कोल्हापूर दौऱ्यावर असताना राज्य नियोजन मंडळाचे कार्यकारी अध्यक्ष श्री.राजेश क्षीरसागर यांच्यामार्फत नगरविकास मंत्री नाम.श्री.एकनाथजी शिंदे साहेबांचा चांदीची तलवार व पुष्पगुच्छ देवून जाहीर सत्कार करण्यात आला. यावेळी हद्दवाढ, घरफाळा घोटाळा, गालेधारकांचा प्रश्न आदी प्रमुख प्रश्न मार्गी लावण्याबाबत श्री.राजेश क्षीरसागर यांनी नगरविकास मंत्री नाम.मा.श्री.एकनाथजी शिंदे साहेबांकडे मागणी केली.
यावेळी बोलताना राज्य नियोजन मंडळाचे कार्यकारी अध्यक्ष श्री.राजेश क्षीरसागर यांनी, नगरविकास विभागाकडून कोल्हापूर महानगरपालिकेस नगरोत्थान योजनेच्या रु.२३७ कोटी, मुलभूत सोयीसुविधेच्या रु.१५ कोटी आणि रंकाळा तलावास मंजूर रु.१५ कोटीच्या निधी मंजुरी बद्दल प्रथमतः कोल्हापूर शहरास मंजूर केलेल्या निधीबाबत आभार मांडले. कोल्हापूर महानगरपालिकेचे आर्थिक उत्पन्न कमी असून, ते वाढविण्यासाठी हद्दवाढ महत्वाची आहे. यासह कोल्हापूर महानगरपालिकेच्या हक्काच्या उत्पन्नावर डल्ला मारणाऱ्या घरफाळा घोटाळ्याची चौकशी होवून दोषींवर कारवाई व्हावी. यासह महानगरपालिकेच्या गाळेधारकांचा प्रश्न मार्गी लावून त्यांना न्याय द्यावा, या संदर्भात मंत्रालय स्तरावर बैठकींचे आयोजन करावे, अशा प्रमुख मागण्याही श्री.राजेश क्षीरसागर यांनी मंत्री नाम.श्री.एकनाथजी शिंदे यांच्याकडे केल्या.
यावेळी बोलताना नगरविकास मंत्री नाम.श्री.एकनाथजी शिंदे यांनी, नगरविकास मंत्री म्हणून कोल्हापूर शहरास न्याय देण्याकरिता आपण कटिबद्ध आहोत. मंजूर निधीतून शहराचा कायापालट होईलच, यासह शहरातील प्रमुख प्रश्न लवकरच मार्गी लावण्याबाबत शासनस्तरावर सकारात्मक निर्णय घेवू, असे आश्वासित केले. यावेळी गृहराज्यमंत्री नाम. शंभूराजे देसाई, शिवसेना सहसंपर्क प्रमुख खासदार संजय मंडलिक, शिवसेना जिल्हाप्रमुख विजय देवणे आदी उपस्थित होते.
